¿Qué supuso Lena Película pa Gonzalo Tapia Director?- Demostré con ella que soi quién a fer cine. Hai un momentu -tras años d'engarre con un proyectu-, que llegues a dudar nun sólu de les tos posibilidaes como director sinon de poder ver el día del estrenu.
Anque la película s'avera al mundu marxinal de la droga, l'espectador nun escaez la sorrisa (amarga ye verdá, delles veces) na mayor parte del film. ¿Qué ye esto, una idealización romántica d'esi mundu o una vocación d'enseñar inda lo más oscuru- entreteniendo?
- Pa mí, lo importante de la película Lena ye, precisamente, Lena. Esa rapaza que fai frente a la vida con mieu pero, tamién, con remangu y coraxe. Les drogues, los matones son les torgues que nun la dexen medrar. Esi mundu conocilo bien, y munchos de los personaxes d'esta historia esistieron realmente y tan ahí, na película, anque tovieren que pasar previamente pola peñera de la imaxinación y la dramatización. Esti ambiente, y que sal afincáu en Vigu, ye d' Avilés, como tamién podría selo guapamente de Bilbao o de Manchester.
Lena nun pudo rodase n'Avilés, como teníes previsto, por falta d'ayuda económica del gobiernu del Principáu y tovo que fese en Galicia, onde sí hobo financiación. ¿Qué ye, que nun esisten tales ayudes al cine n'Asturies o foi que tú nun les algamaste?
- N'Asturies lo que fai falta ye una política audiovisual. Ye verdá que nun tuve ningún tipu d'ayuda económica y por eso toviemos que rodala fuera. Pero esu nun ye lo más grave, pos la película ya ta fecha...Lo que deberíe preocupanos a los asturianos ye que 'l nueso gobiernu enxamás tovo interés pol tema audiovisual. Dolfu Camilo Díaz diz qu'un pueblu ensin audiovisual nin se autolexitima nin se lexitima delantre los otros. Y ye verdá. Esta falta patrimoniu audiovisual y eso ye dalgo más que documentales antropofolk- fainos ser una rexón de segunda o de tercera...
¿Sedrá verdá eso que dicen qu'Asturies is different?
- Esi yera un slogan de la España miserabilista. ¿Queremos realmente seguir asina mientres Cataluña, Euskadi y Galicia afitense n'Europa? Esto ye lo que deberíemos entrugános los asturianos.
Dexando yá la película, ¿cómo ta agora mesmu 'l panorama cinematográficu n'España? Dizse que tamos viviendo una perbona época...-Ye verdá qu'hai grandes ésitos de taquilla, pero nun ye igual pa toos. Qu'una película faga l' ochenta por cientu de taquilla de tol cine español ye bono en cifres pero non en resultaos. El problema que tien güei 'l cine español ye qu'hai una política de concentración qu'emburria a los grandes grupos. Na mio opinión, l'ésitu del nuesu cine vien de pequeñes producciones como El Bola, Solas, Flores de otro mundo, Pau y su hermano...
¿Los americanos por qué enllenen les sales de cine? ¿Tienen más perres, tienen más imaxinación o qué ye ello?
- N'EEUU l'audiovisual ye 'l primer esportador y ye una estaya d'interés nacional cuidáu y mimáu. Ellos furrulen como grandes empreses y defendenlo a sangre y fueu. Tamién ye verdá qu' algamaron una manera de contar les histories como lo “universal” a través de productos de fácil consumu y con grandes medios.
¿Tienes d'algún proyectu na faltriquera nel cine siempre hai que falar de cartera- pa entamar un nuevu proyectu?
- Prestariame abondu fer una pelícua de ”terror” n'Asturies, en Lluarca, en concretu.
Pa finar polo que me toca y porque della xente me lo entrugó 'l día del estrenu de Lena- ¿qué pasó cola idea de llevar al cine “Histories d'un seductor. Memories d'un babayu”?
- Pos ye un proyectu que siempre tengo na tiesta; dafechu, estos díes volví presentailo a un productor. Ye un proyectu caru, hai que felo bien y ensin roñeces.
Delles preguntes pertinentemente curties
¿Drogues?
- Necesaries
¿Por delantre o por detrás?
- Si hai que dar.. por onde seya.
La pior película d'ésitu que viste últimamente.
- Celos
El Papa ¿cómo te pon?
- Ensullo.
¿PP , PSOE, PC, PAS...?
- PPPP, PPPSOE, PPPC, PPPAS... La conquista del centru mató la política.
El meyor film de la historia.
- La madre de Pudovkin.
P'acabar, ¿qué pregunta te prestaría que te fixera un entrevistador más intelixente que yo?
- ¿Quiesme?